چاپ

ناظری ساخلا جاودان تبریز

 

آی آدی خسته جسمه جان تبریز

تپراقی ایستی مهربان   تبریز

 

تپراقیندا   مقامه  باخ  .  سنده

شهریار   ائیلیوب   مکان  تبریز

 

ناظرین جسمینی  آپاردین  سن

ساخلاقوینونداهمچو جان تبریز

 

نئجه ناظر آدین  گلنده  سنون

عشق ائدردی چوعاشقان تبریز

 

بیلمیرم هیچ ندندی کی منده

چکیرم حسرتین یامان .  تبریز

 

تپراقیندا نه وار سنون ای جان

سنه عاشیقدی  عارفان تبریز؟

 

شعرا نین گوزو  قالیب  سنده

حسرتین سینه ده  نهان تبریز

 

تپراقیندان سنون "نجفلو" اوپر

گر    اجلدن   تاپا   امان   تبریز

 

سندن آی شهریم انتظار بودو کی

ناظری   ساخلا     جاودان  تبریز

 

مهدی نجفلو

 

در ماتم استاد

 

قورولوبدور گئنه ماتم

بورویوب غم

بوتون ائللر گیینوب قاره لباسین

ناظرین ائللری برپا ائلیوب

 ماتم اساسین

اوخویور سوره ی یاسین

قورولان بزم عزاده

علما ده

شعراده

آخی ناظر اؤزو  جزو علمادیر

همی فخر الشعرادیر

روحیده مجلسه ناظر

اؤزو حاضیر

قورولان بزمیده بیل

صاحب عزادیر

شاعیر اؤلمز

نه قَدَر واردی اثر شعر و غزلدن

شعرا دور کی وئریب پیرینی الدن

قوی آلیم بهره بو یئرده

بو مَثَلدن

کی یازیب سعدی شیراز

او سخن ساز

"مرده آن است که نامش

به نکوئی نبرند" آااااااخ

ناظرین وصفینه شاعرلریمیز

سوز قوشاجاخلار

داشاجاخلار جوشاجاخلار

آخی بو رسمیدی ایراندا

دیری قدری بیلینمز

دووسه لرده بیری دینمز

اؤلمه سه کیمسه دیریلمز

ائله کی اؤلدی

 اونون عکسینه تعظیم ائده جکلر

اونا برنامه ده تنظیم ائده جکلر

گله جکلر گئده جکلر

بدرقه ائیلیه جکلر اونو تا عرش علایه

بو عجب رسمیدی کی

قسمت اولوبدور شعرایه

در حقیقت اگر ایستیر

بیری الان اولا زنده

یاتا لازیمدی لَحَدّه

گوره بیر عده کفن ده

اولا زنده

بو وطن ده

آخی بیز مرده پرستوک

هله مستوک

ای نجفلو سنیده بیر گونو آلقیشلیاجاخلار

نه قَدَر وار نفسون داشلیاجاخلار

سن اؤلندن سورا بیر بزم عزا باشلیاجاخلار

سنی تعریف ائده جکلر

دوسلارین ماتموه هی گله جکلر گئده جکلر

اما فعلا نه قَدَر اؤلمه سن اولماز

ولی بیرگون بیلیرم کی اؤله جکسن

بو دونومدن دونه جکسن

چیراغ اولسان سونه جکسن

مژده شاعیر بو خبردن

کی یقینیم وار ازلدن

اؤله جکسن

اؤله جکسن

و اؤلوم بیر یئکه نعمتدی عزیزیم

اینانیبسان؟

 

نجفلو مهدی