محمد داوریار اردبیلی

شوونیزم (عظمت طلبی)، ارتجاعی عقیده اولاراق، ملّتلری اسارت آلتینا آلماق، ملّی ایکی تیره‌لیک و دشمن‌چیلیگی قیزیشدیرماق، بیر ملّتی اۆستۆن و باشقا ملّتلری آلچاق حساب ائده‌‌رک، عرقچی‌لیک اساسلی، سرمایه‌دارلارا و صهیونیستلره مخصوص سیاستدیر.

بیر ملّتین اۆستۆنلۆک و منافعینی قورویاراق باشقا ملّتلرین ضررینه تبلیغ ائدیر. مختلف خلقلرین اؤز مقدراتینی تعیین ائتمک و آزاد یاشاماسینی کسکین صورتده انکار ائدیر. ملّی ظلمۆ تشویق ائده‌رک، ملّی مسئله‌نین حلّینه مانعه‌چیلیک تؤره‌دیر.

صدیق ضد شوونیست[1] و ضد صهیونیست حرکاتین گؤرکملی باشچیلاریندان اولاراق، افشا ائدیجی سندلرله، توتارلی و ایناندیریجی دلیل‌لرله شوونیست نظریه‌لرینده‌کی دوآلیزم و ضدیتلرین علمی تحلیلینی وئرمیش، اونلارین باخیشلارینداکی دولاشیق‌لیقلاری اۆزه چیخارمیش، ایدئولوژیک قابیقلار و عرقچی‌لیک پرده‌لر ایله اؤرتۆلمۆش فکرلرینی، تفرقه‌چیلیک فعالیتلرینی، قصدچیلیک تاکتیکالارینی، ملّی عداوتی قیزیشدیرماق سیاستلرینی، استراتژیک دیپلوماتیالاری‌نین مرتجع خصوصیتلرینی آشکارلامیش، اونلارین ایدئولوژییالاری‌نین ضد بشر مقصدلی، ماکیاولیست مسلک‌لی، اوپورتونیست مراملی، فاشیست عقیده‌لی، خیردا سرمایه‌دار طریقت‌لی(فاشیزم، تروریزم و آنارشیزم) و آوانتوریست حرکتلی اولماسینی گؤسترمیش، صهیونیستلر و شوونیستلرین نظری جفنگیاتینی پوچا چیخارتمیش، اونلاری ایده‌یاجا ترک سیلاح و ایدئولوژیک جهتدن دارما ـ داغین ائتمیشدیر.

بیر صفتلی ‌مین اۆزلۆ، بیر ماهیتلی‌ مین صورتلی صهیونیست شاهچی شوونلرین سیاستی‌نین مرتجع ماهیتینی دریندن درک ائده‌ن «صدیق» عیرقچیلرین یاشایان حاکم ملّته منسوب اولمایان خلقلرین، ملّی ـ مدنی و معنوی ـ اجتماعی حقوقلاری حقّینده عمومی نظریه‌لرینی تکذیب ائده‌ن علمی ـ تنقیدی یازیلاری، نطقلری، محاضره‌لری، ملاحظه‌لری و مباحثه‌لری ایله، سون درجه لغت خزینه‌سینه، سؤز احتیاطینا، معنا توتومونا، دوغوجولوق قابلیتینه، سؤز تؤره‌تمه و سؤز آلما استعدادینا مالک، مدنی وارلیغیمیزین و ملّی اؤزۆمۆزه مخصوص‌لوغوموزون اساس گؤستریجیلریندن اولان دیلیمیز، ملّی منسوبیتیمیز حقّینده ایران پهلوی محیطینده فورمالاشان شوونیست باخیشلاری آلت ـ اۆست ائتمیش، اونلارین مراملاری‌نین اؤلکه‌نین اراضی بۆتۆنلۆگۆنه و اؤلکه‌ده یاشایان خلقلرین ملّی بیرلیگینه، حقوق و آزادلیقلارینا، ملّتلرین دینج یاناشی، خوشبخت، آزاد، برابر حقوقلو، بیرگه اجتماعی حیاتینا، ملّی مناسیبتلرین تکاملونه بۆتۆنلۆکله ضد اولدوغونو افاده ائتمیش، شوونلرین باسغین پلانلارینی، هجوم عملیاتینی، غیری حاکیم ملّتلرین مدنیتینی داغیتماق فکرلرینی آچیب گؤسترمیش، مترقی ملّی اساسلارا سؤیکنه‌ره‌ک تاریخی موقعدن و مدنی نقطه‌ی حرکت‌دن چیخیش ائده‌رک صهیونیست شوونیستلرین غیری علمی، غیری تخصصی و گۆلۆنج ملاحظه‌لرین تنقید ائتمکله یاناشی، اونلارین ایدئولوژییالاری‌نین فکری منبعلرینی، مادی دایاقلارینی، اجتماعی کؤکلرینی، نظری اساسلارینی، تئوریک بازالارینی تنقید اودونا توتموش، صهیونیست و شوونلرین فکری امک جبهه‌سینه باشچیلیق ائده‌نلرین نظری ـ تاکتیکی و عملی استراتژیک حرکتلری‌نین بۆتۆن خصوصیتلرینی داهیانه آیدینلیقلا شرح ائتمیشدیر. صهیونیست شوونیستلری مدافعه ائده‌ن عالِم‌نمالارین، شاهلیق رژیمی‌نین دیپلوم‌لو نوکرلری‌نین و تنخینکی ایدئولوقلاری‌نین موقعلرینه سارسیدیجی ضربه‌لر ائندیرمیش‌دیر.

اونون صهیونیستلر و شوونیستلر حقّینده د‌ئدیکلری سؤزلرده ایندیکی دُورده شوونیستلرله خلقلرین حقیقی نماینده‌لری آراسیندا گئده‌ن ایدئولوژیک مبارزه و مفکوره‌وی محاربه‌نین ییغجام منظره‌سی وئریلمیش و شوونیزمین ایدئولوژیک هجوملارینی قطعیتله دفع ائتمک ضرورتی بۆتۆن کسگین‌لیگی ایله ایره‌لی سۆرۆلمۆشدۆر. صهیونیستلر و شوونلرین حرکاتینی تحلیل ائده‌رکن افاده ائتدیگی بیانات دقتیمیزی صهیونیست و شوونیست تبلیغاتینا و وطن دشمنلرینه قارشی مبارزه‌ده اؤلکه‌میزین، ملّی حرکاتین منافع و مقصدلرینی فعال مدافعه ائتمک ضرورتینه و یورتداشلاری‌میزین شعورونو وطن‌پرورلیک روحوندا تربیت ائتمک لزومونا جلب ائتمیشدیر.

صدیقین صهیونیستلر و شوونلر حقّینده نظریه‌سی ملّی ـ علمی فکرین ان پارلاق و بؤیۆک نائیلیتیدیر. ایندیه‌دک تاریخ، سیاست و مدنیت ساحه‌سینده مسئله‌لره باخیشلاردا حؤکم سۆره‌ن هرج ـ مرجلیک و اؤز باشینالیغین یئرینی سون درجه مکمل، سیستملی و دۆزگۆن بیر تعلیم و علمی نظریه توتدو، صدیقین صهیونیستلره و شوونلره قارشی علمی فکری و تاریخی نظریه‌لری، ایدئولوژیک مبارزه‌نین ان بؤیۆک موفقیت‌لریندن، صهیونیستلره و شوونلره ائندیریلن ان گۆجلۆ معنوی ـ روحی ضربه‌لردن‌دیر.

بیز آرا وئرمه‌دن ایدئولوژیک محاربه شرایطینده یاشاییریق، بو محاربه‌نی اؤلکه‌میزه قارشی و ملّتیمیزه قارشی صهیونیست و شوونیست تبلیغاتی آپاریر، همده ان اینجه اصول و گۆجلۆ واسطه‌لردن استفاده ائدیر. شعورلارا تأثیر گؤسترمک اۆچۆن اونلارین الینده اولان بۆتۆن واسطه‌لر، رادیو، تلویزیون، کتاب، مطبوعات، سینما، مکتب و دانشگاه و سایر، آداملاری آزدیرماق، اؤز آشیری و افراط عیرقچی تصورلری اونلارا آشیلاماق، باشقا خلقلره بهتان آتماق و افترالار اۆچۆن تجهیز ائدیلمیشدیر.

آیدین فکرلیلریمیز، الی قلم‌لیلریمیز، صنعتکار، ادیب، عالِم و یازیچیلاریمیزین وظیفه‌سی فکری ـ نظری، علمی ـ ادبی و مدنی ـ اجتماعی جبهه‌لرده بو ایدئولوژیک هجوملاری واختیندا کسکین‌لیکله و عزمله دفع ائتمکدن، خلقین حیات طرزی، تاریخی و شخصیتی حقّینده حقیقتی میلیونلارلا آداما گؤرمک چاتدیرماقدان عبارتدیر. بو ایشی ایمانلا ایناندیریجی، آیدین و پارلاق شکیلده گؤرمک لازیمدیر.خلقیمیز حقّینده حقیقتین سسی اؤلکه‌نین هر یئرینده ائشیدیلمه‌لیدیر. ایندیکی دُورده شوونیزمه و صهیونیزمه قارشی، تاریخی ساختالاشدیرانلارا قارشی قطعی مبارزه آپارماق خصوصیله بؤیۆک ملّی ـ مدنی اهمیت کسب ائدیر. شوونیزم و صهیونیزم ایدئولوژییاسی‌نین و تبلیغاتی‌نین وطنی‌میز، تاریخی‌میز، مدنیت و ادبیاتی‌میز حقّینده بوهتان و اویدورمالارینا قارشی موفقیتلی و هجومچو مبارزه آپارماق اۆچۆن ایده‌یا دشمنلریمیزین ساواش تاکتیک‌لرینه دریندن بلد اولمالیییق، اسلام دشمنلری‌نین اساس جهتلر و مختلف جریانلارینی بیلمه‌لییک.

شاهچی شوونلرین ایدئولوژیک تخریبات هدفلریندن بیری ده، ملتین تاریخ، دیل، مدنیت، و ملّی منسوبیتینی هر واسطه ایله تحریف ائتمه‌گه چالیشماقلاریندان عبارتدیر. بو بیرینجی نوبه‌ده ملّتین بؤیۆک عقلی امک قابلیتینه، یارادیجیلیق گۆجۆنه، باجاریق، استعداد و اجتماعی جاذبه‌ قوّه‌سینه اولان «واهمه» ایله علاقه‌لاردیر.

ملّتین تاریخینی لکه‌لمک و ساختالاشدیرماق جهدی ده بورادان ایره‌لی گلیر. صدیق شاهچی شوونلرین تحریفلرینه کفایت قده‌ر، وقتینده، توتارلی جواب وئرمکله یاناشی، اونلارین ایدئولوژیک هجوملارینا و عرقچی‌لیکله آشیلانمیش نظریه‌لرینه قارشی باریشماز مبارزه آپارماغی واجب وظیفه‌‌لردن بیری کیمی تکلیف ائتمیشدیر. شوونیستلرین و صهیونیست‌لرین ایدئولوژییاسی‌نین، ضد اسلام اولماق افشاسینی گۆج‌لندیرمک مسئله‌سینه خصوصی دقت یئتیرمیشدیر.

شوونیزمین و صهیونیزمین ضدیتلرینی کسکین صورتده و جسارتله پارلاق شکلیده تنقید ائده‌رک، نظریه‌لری‌نین عاجز پوچلوغا چئویریلدیگینی نمایش ائتدیرمیش، مرتجع باخیشلاری‌نین ارتجاعی، ماهیتینی افشا و درین تنقیدینی وئرمیش، داهیانه آیدینلیق و آردیجیللیقلا تصویر ائتمیش، اونلارین مقصدلرینی آنلاماغا چاغیرمیش، مدنی ـ اجتماعی و ملّی ـ مترقی قوّه‌لری هر یئرده شوونلره و صهیونیستلره قارشی بیرگه مبارزه آپارماغا سسله‌میش، اونلارین نظریه‌لری‌نین ملّی اتفاق و اتحادا تهلکه‌سی اولان عمللری و فکرلرینی جدّی، دائم و درین علمی تحلیللرله افشا ائتمه‌گی آیدینلاری‌میزین ایدئولوژیک ایشه داها فعاللیقلا یاناشمالارینی طلب ائتمیشدیر. شوونلرله مفکوره‌وی محاربه‌نی ایدئولوژیک جبهه ایشچیلری‌نین ان واجب وظیفه‌لریندن بیری کیمی معین‌لشدیرمیشدیر. شوونلر و صهیونیستلر و اونلارین مرتجع ایدئولوژییالاری‌دا مغلوبیته محکوم‌دور. لاکن بونونلا بئله شوونیست ایدئولوژییاسینا، اونون مهم ترکیب حصه‌سی و باشلیجا جریان اولان آنتی اسلامین اساس اؤزه‌گینه قارشی مبارزه‌ده هئچ بیر لاقیدلیگه یول وئرمک اولماز.

خلاصه «صدیق»، شوونلرین نظریه‌لری‌نین قوندارمالیغینی، قوراشدیریلمیش و فیریلداقچی عمللر اۆچۆن حاضرلانمیش خصوصیت داشیدیغینی، چیرکین و تحقیر ائدیجی رولونو آشکارلامیش، هر جۆر ملّی ـ مترقی حرکاتا دشمن اولدوقلارینی اؤلکه اهالیسی اۆچۆن ضررلی، داغیدیجی و ضد اولدوغونو ثبوت ائتمیش، عرقچیلرین ملّی لیاقتی تاپدالایان، ملّی وارلیغی شبهه آلتینا آلان، پوزغونلوق سالماق، ملّتلرین ملّی دیرچه‌لیشینه مانع اولماق حرکت‌لری تحلیل ائتمیشدیر. «صدیق»ین بۆتۆن شعرلرینده و علمی اثرلرینده ضد صهیونیستی حال و هوا حس اولونور. اونون بیر شعرینی بورادا نقل ائدیریک:

بورا «‌‌الخلیل»‌ دیر

 

بیر دینله تبریز: 

بوراسی «‌‌الخلیل»‌ دیر!

اوزون عصرلر شهری،

فلسطین توپراغی‌‌نین قاشداشی،

بیلینمه‌ییر یاشی.

 

ابراهیم (ع) حرمینی قوجاغیندا ساخلایان یورد

بورادیر!

اطرافینی سارمیش ییرتیجی آیی، آج قورد

بورادیر!

بلی، بوراسیدیر.

 

من اونودمامیشام کفر قاسیمی،

تل زعتری

تل یاسینی...

ایندی تکرار اولور او دقیقه‌‌لر،

آچیلیر قارشیمدا چوخ دفینه‌لر.

شهادت گنجی وار بو دفینه‌لرده،

قانلی قیلینجلار ساخلانیر بطنینده اونون.

ظن ائتمه جنایت ائله بوگۆن‌مۆش

تاریخین ان اسکی صحیفه‌لرینی،

قانا بویامیشدیر بنی اسرائیل 

‌‌لَعِنُوا‌ دئییبدیر قرآن‌دا اونا

اللری زنجیره باغلانمیش دئمیش.

ایندی لاکین بعضاً اللرین آچمیش

اؤزۆن اۆستۆن نژاددان سایان شوونیست

مسلمان قانینا بله‌ییر هرگۆن

 

بورا «‌‌الخلیل»‌ دیر

فلسطین توپراغی‌نین داش قاشی

بیلینمه‌ییر یاشی.

قانا بلندیلر مظلوم عربلر...

اونلارین‌دا یاشلاری

«‌‌الخلیل»‌ یاشی کیمی هئچ بیلینمه‌ییر...

انسانلیق یاشی قده‌ر یاشلاری واردیر.

اؤلمه‌میش بوردا اؤلدۆرۆلنلر

اونلارین قانلاری

منیم دامارلاریمدا

سنین دامارلاریندا

دولانیر تبریز.

 

بورا «‌‌الخلیل»‌ دیر،

بوسنادا صربلر

قاراباغدا داشناکلار

هامیسی بیلیر کی:

بورا «‌‌الخلیل»‌ دیر...



[1] شوونیست: ملی‌گرا.

نوشتن دیدگاه


تصویر امنیتی
تصویر امنیتی جدید