زاهیده جنّت تمناسیندا حورادیر غرض
عاشقه میخانه دن اول شوخ ترسادیر غرض
شیروانلی سید عظیم
اوستاد شرفخانالی ناظیرین یارادیجی عالمینه اوتری نظر سالماق
بهبود مرادی "ائلچی بی"
بللی دیر کی زهد پالتارینی چیخاریب یئلنگ(خرقه)گئیین شرفخانالی ناظیر هله گنج یاشلارین نان اوز یاشام طرزینی آیری فیکیرداشلارینان آییرمالی اولموشدور؛چونکو شرفخانالی ناظیرین یئددی قاتیندا اوچماق هوسی واریدی؛او خالقینین دانیشان دیلی اولدوقجا دالغالی روحو اونون قیزیل قفس ده یاشماغینا ایمکان وئرمه ییردی؛1317نجی گونش ایلی تولدلو اوستاد ناظیر گنج یاشلارین نان دین خادیمی اولاراق موقدس قران کریمین آیه لرینی اوخویوب اوز ایچری بوشلوقلارینی عرفانی دوشونجه لرینن دولدورمالی اولموشدور؛عرب فارس و تورک دیللرینده قالارقی اثرلر یارادان شرفخانالی ناظیر قرآن کریمین ترجمانی اولاراق موحجوزه وی آیه لری ساده لشدیریب شعیر دیلینن دئمه گی یاخشی باجارا بیلمیشدیر؛اوستاد شرفخانالی ناظیر قرآن آیه لرینن مایالاناراق عرفان دوشونجه لرینده تورک و فارس دیللرینده آچیقلایاراق چوخلو یئنی واریانتلاردا علاوه ائله یه بیلمیشدیر؛شرفخانالی ناظیرین دالغالی روحون نان قایناقلانان سوزلر گاهدان ائله اویناقدیر کی کتابلارینین قاتیندا قالماقدان بئله چتین نیک چکیرلر؛چونکو بیز خوش نغمه لی بیر بولبولو قیزیل قفس ده ساخلاساقدا او موطلق باشینی دمیر مفتیللر چیرپیب اوچماغا دوغرو یول تامالی اولاجاقدیر؛شرفخانالی ناظیر دینچلیگینن باغلی اثرلری اوخودوقجا هله گنج یاشلارین نان فارس عرب و تورک دیللرینده یازیلمیش شعیر کتابلارینیدا اوخویوب هر گولدن بیر پای آلماغی یاخشی باجارا بیلمیشدیر؛بو اولیا باخیشلی اوضمانیمیز منسوب اولدوغو آذاربایجان تورک ادبیاتی نی اوخوماغینا باخمایاراق شاعیر اولاراق اوزوده چوخلو اینجی لر یاراتماغینان ادبیاتیمیزا یئنی لیکلر گتیرمه گی باجارا بیلمیشدیر؛اگر سوزومون ثبوتونا اوستادین اثرلرین نن اورنگ گتیرمک ایسته سز تکجه (اورمو دریاچاسی) آدلی شعیری کیفایت ائله ییر؛شاعیر بو شعیری یازماغینان اوستاد شهریارین (سهندیه) آدلی شعیرینی تاماملاماغی اورتایا قویموشدور؛شرفخانالی ناظیرین یارادیجی عالمینه نظر سالاراق اونون ال الوان دوزدوگو سوز اینجی لری ایچینده بو سیریغی(بیت) اوخویاندا:
چلیپا زولف ایله چکدین منی سمت کلسایه
بو شیخ قارا بختی شیخ صنعان ائیله دین سئودا
شبیسترلی شیخ محمودون
بت و زنّار و ترسايي درين كوی
همه كفر است وگرنه چيست برگوي؟
دوشونجه طرزینی گوز اونونه گتیریر؛ویاخود اوستادین(دیوان ترکی ناظر شرفخانه ای)کتابین نان(ساقیا)آدلی بو بیر سیریغینی(بیت):
باده دن دولان سینه کینه دن اولار خالی
محو اولار قارانلیقلار؛گون گلنده میدانه
اوخویاندا ایکی دونیاسی اوزونده سیغمایان آذاربایجانین داهی شاعیری بویوک نسیمی نین (مرحبا) ردیفلی بو سیریغی
چون لبین جامی جم اولدو نفخه یی روح القدوس
ای جمالیم؛ای جمالیم؛بهر و کانیم مرحبا
بیر آییری فورمادا یادا سالاراق عکس ائتدیریر؛
شرفخانالی اوستاد ناظیرین بویوک فیضولی دن بارلانیب تاثیر آلماسین نان دانیشسام سوز اوزونا چکرامما اورنک اولاراق تکجه بیر عباره سینه ایشاره ائله ییرم کی بویوک فیضولی اوزون ردیف لی بیر شعیرینده دئییر:
گورمه سم هر گوز ایچینده؛اول گول رعنا اوزون
گوز یومونجا اشک گولگونوم توتار دونیا اوزون
شرفخانالی ناظیر اونا اوخشار دوشونجه طرزینی بئله بیان ائله ییر:
یاناغین بنزه ییر ناره؛ساچین بیر قیوریلان ماره
بیریسی سینه می بریان بیری قان ائیله مز نئیلر؟
ناظیر تفککورونده اوزون نن آسیلی اولمایاراق بیر سوموگه ایشلمیش درد و نیسگیل واردیر کی یووش(قلم) ووردوقجا اوزونو بروزا وئریر؛اوستادین یارادیجی عالمی نن تانیش اولانلار البتده کی منیم سوزومو تسلیق ائله ییرلر؛بو درد حتی شاعیرین یومور شعیرلرینده ده اوزونو گوزتریر؛ اوستاد ناظیرین موللا پناه واقیفه تای سئوگی اوسته یازدیغی شعیرلری بوگونکو گنج نسیلین دیل ازبری اولموشدور؛چونکو بو شاعیرین قوجالیغی کوهنه وئرن کیمین اورک سئوگیسی هئچ زامان اوز رنگینی آتمامیش آردوج آغاجی کیمین سکسن اوچ یاشینا قدر اجازی ده اولسایدا هله باشی آغیتلی قیزلارا گوز وورماق ایسته ییردی؛اگر بیز بوگونکو چاغداش آذاربایجان تورک ادبیاتیمیزدا اوستاد ناظیرین یئرینی آختارساق گرکدیرکی اونو اوستاد شهریارینان بیرگه زوهره نین ایوانیندا اییلنجه قورموش یان یانا گورمه لی اولاق؛چونکو یوخاریدا وورقولادیغیم کیمین شرفخانالی ناظیر یارادیجی عالمینده هر گوزلدن بیر پای آلماغی یاخشی باجارماغینا باخمایاراق اوزوده گئت گئده یازار و شاعیرلریمیزه وئره سی پای گوز اوخشادیجی اولموش و گله جکدده اینانیرام بو عنعنه داوام ائله یجکدیر؛قوجامان شاعیریمیز کارانا ویروس پاندیماییاسینان ایکی ایله یاخین ائوینده دوستاق اولسادا اونون هوسکارلاری و یئتیرمه لی اوزاقدان اوزاغا حالین سوروشماغینی اونوتماییردیرلار؛یادیمدادیر 1399نجی ایل پاییز موسمونده کرج شهرینه یولوم دوشه رک بیر دونه اوستادین زیارتینه گئدیب اوتدوغو سارایینین قاپیسینی موقدس اوجاق کیمین اوپمه گه نایل اولا بیلمیشدیم؛ بو گوروشده اوستادین سون واختلار داریخمالارینی سببی نی سوروشاندا گوزلری دولا دولا بیر دونه اوزونو بیله مه توتدو دئدی بلکه ده سیزینله سون گوروشوم اولدو؛شرفخانالی ناظیر قریبجه سینه ایچیمیزدن کوچسه ده صنعتکارا اولوم یوخدور دئییه او گونش شوعالاری کیمین هله ده وار قارانلیق گونلریمیزه سالاجاقدیر؛اوستادین یارادیغی آل تون قیمتلی اثرلر حاق کلامی کیمین هله ده وار گله جه گیممیزده یول گوزتریجی اولاجاقدیر؛ایللر بویو اوستادین وارلیغینان نفس آلدیغیما گوره حیاتینی دَییشن نن هر گئجه یاتاندا دیوانینی دیوانینی اوخویورام کی بلکه یوخوما گلیب هله یازمادیغی قوشما گرایلیلارینان بیریسی نی بیله مه اوخویوب اوره گیمه توخدالیق گتیریب یئنه ده ایلهام قایناغیم اولسون؛بللی دیر کی هر کیمسه دوغولوب بویا باشا چاتدیغی و منسوب اولدوغو خالقینی عومور بویو اونوتماییب اونلارین وارلیغینان نفس آلمالی اولور؛بو باره ده بیزیم اونودولماز اوستاد شاعیریمیز شرفخانالی ناظیرینده چوخلو شیرین یوخولاری و دئمه لی خوش خاطیره لی واریدی ؛اوستاد ناظیر اینانجلی بیر اوضمان اولاراق هممشه اوروج توتوب ناماز قیلماغینان ایناندیغی تانری یا باش ایمه گی یاخشی باجاراردی؛امما من دئییردیم کی اوستادناظیرین تانری ائوی اولان مکه شهرینده سونرا ایکینجی بیرآییری قیبله گاهی واریدی؛اودا آذاربایجان آدی ودوغولدو شرفخانا شهریدی؛ائله اونا گوره ایدی اوستاد دونیاسینی دَیشمه میشدن اونجه من اولدوم نفس سیز جانیمی شرفخانایا آپاریرسیز ایشماریشینی قالارینا وئرمیشدیر؛اوستاد تاپیشیریغینا رغمن اوز وصییت ائله دیگی شرفخانا شهری نهایت کی دونیاتلیق مدنیت باش کندیمیز اولان ادیب لر اوضمانلار یئتیرن تبریز شهرینده توپراغا تاپشیریلمیشدیر؛ایندی منیم گوزومون قارشیسیندا بیر(آذربایجان) آدلی قوشماسی اولارکن آدی گئدن شعیری اوز اوزومه زوم زومه ائله یه ائله ی اوستادین روحو قارشسیندا باش اَییب سیز حورمت دی اوخوجولاریمناندا ساغ اولاشماق قرارینا گلیرم؛من بئله دوشونورم کی زامان اوتدوکجه مین لر شاعیریمیز و یازیچیمیز گله جکدیر امما اوستاد شهریار و شرفخانالی ناظیرین اوتدوق لاری سارایا گیرمه گه نه ایسه قاپیچیدان ایذن آلمالی اولاجاقلار؛من بو قدر گلن پایلاشانا قدر؛