زنده یاد عزیز محسنی
ناظر شرفخانه ای، "اورومو دریاچه سی" آدلی پوئماسیندا خلقی میزین، ائلیمیزین، دردلریندن، کدرلریندن، آرزو، امیدلریندن، رسم لریندن، عنعنه لریندن شاعرانه بیر طرزده یاد ائدیر.
او وطنیمیزین گؤزه للیک لرینی، داغلارینی، یاماجلارینی، دره لرینی، چایلارینی، قوشالارینی، سؤزلرینی، آوازلارینی، شیرین - شیرین افسانه لرینی، داستانلارینی، اوره ک اوخشایان منظره لرینی بؤیوک بیر مهارت و درین بیر سئوگیله اوخوجونون گؤزلری اؤنونده جانلاندیریر.
او وطنداشلارینین، بو ائل بالالارینین، اللریندن توتوب بو گؤزه للیک لری گؤرمه یه دوغرو هدایت ائدیر و هر بیر وطنداشین قلبینده، وطن پرورلیک عشقی، ائل و یورد سئورلیک سئوگیسی نی داها دا آلوولاندیریر، کدرلری، نیسگیل لری، حسرت لری، سئوینج لری، قلبلرینده بیر - بیرینه قاریشان آداملاردا نیک بین لیک حس لری یارادیر و اونلارین اوره یینده امید تخومو اَکیر.
ناظر شرفخانه ای، عالم لریمیزی، شاعرلریمیزی، متفکّرلریمیزی یادا سالیر، کئچمیشلریمیزدن، شانلی تاریخیمیزدن اینجه لیک لر ایله صحبت ائدیر:
اورومو دریاچه سی! توفانلی دنیزلر باشی سان سن،
پارلایان تاج طبیعتده برلیان قاشی سان سن،
دوزلو، ایسته کلی، ماراقلی دره - داغ یولداشی سان سن.
... یئری وار آی سنی اؤپمکلیگه گؤیدن یئره اَنسین،
اته یین ایچره، گؤی اولدوزلاری غربیلدن اَلَنسین،
آیاغین آلتینادا فرش زمرّد سَره لَنسین.
... او "خیابانی" و "معجز" کیمی ائولاد دوغوبدور،
ظالمین بورنون اوووبدور،
شیخ "محمود"ه او، الهام ائله ییب "گلشن راز"ی،
اؤیره دیب راز و نیازی،
گؤستریب قیش گونو یازی...