دكتر حسين محمدزاده صديق
شيخ محمود شبستري‌نين گلشن راز مثنويسي‌نين فارسجادا يازيلديغيندان تام يوز ايل سونرا، آدليم عارف « شيخ الوان ولي شيرازي» همين مثنوي اساسيندا، توركجه مثنوي يازميشدير.
شيخ الوان شيرازي بورادا بير ترجمه‌چي كيمي يوخ، بلكه بير ياراديجي كيمي، ديليميزه فلسفي- عرفاني بير اثر قازانديرير. او، گلشن رازين بئيتلريني ترجمه ائدير، اونلارين اساسيندا، عرفاني لطيفه‌لري بحثه قويور و شعريت جذبه‌سي ايله، اوخوجونو بو مسأله‌لري منيمسه‌مه‌يه سوق ائدير.
اگر شيخ محمودون گلشن رازي ييغجام و مختصر مفيد بير اثرديرسه، شيخ الوانين گلشن رازي داها چوخ ايضاحلي دير و داها چوخ ياييلميش و منيمسه‌نميشدير. او، شيخ محمودون فارسجانين بلكه‌ده محدود ظرفيتيندن آسيلي اولاراق قورو و علمي ادا ايله يازيلان سوزلريني، توركجه‌ميزده سليس و روان بزه‌كلر ايله دولدورموشدور.
مثال اوچون «گلشن راز» ين باش بولومو، اصلينده قورو بير بيلگي افاده‌سيدير. اوندا شعريت جذبه و وجدي آزدير. الوان شيرازي ايسه بو قورغونو دگيشميشدير. او، باش بولومو بئله باشلايير:
نفس اوردو او رحماني نسيمي،
معطر اولدو جان و دل حريمي.
ازل گويونده گور رحمت سحابين،
ابد يئرينه توكدو نعمت آبين.
شفق بو شفقتي گوردو اوفوقدا،
بو حرمتدن خجيل اولدو توتوقدا.
عنايت مهري چون كيم آچدي چهره،
شعاعي مُهره اوردو ماه [و] مهره.
مگر نوروز عزت گلدي نازه،
سعادت نوباهارين قيلدي تازه.
محبت بولبولو گوينده اولدو،
شفاعت گولشني جوينده اولدو.
يانار نور كرمدن گول چيراغي،
دولار فضل سمندن لطف باغي.
حاج بايرام ولي‌نين مريدلريندن ساييلان «شيخ الوان ولي شيرازي»نين توركجه‌ميزه قارانديرديغي ان اؤنملي و آدليم اثري، شيخ محمود شبستري‌نين گلشن راز اثري‌نين ترجمه‌سي، تعديل و تصنيفي‌دير.
شاعيرين آدي حاققيندا ايلك اؤنجه «عثمانلي مولفلري» كيتابيندا سوز آچيلميشدير. او اثر، شاعيري «شيرازي الوان چلبي» آدلانديرير. مرحوم محمد علي تربيت ايسه يالنيز «شيرازي» يازير.[1] باشقالاري‌دا او جمله‌دن بانارلي، شيخ الوان شيرازي آدلانديرميشلار.
گنج مولف «محسن نقي سويلو» علمي مقاله‌سينده، شاعيرين اؤز ديليندن صادر اولان آشاغيداكي بئيتلره استناد ائدرك اونون آديني «ولي شيرازي» قئيد ائدير:
ولي، وارليغيني انديشه ائيله،
تني حقاني خمره شيشه ائيله.
«ولي شيرازي»يي خئير ايله ياد ائت،
دوعا ايله آنين روحونو شاد ائت.
اگر «منصور» ايسه مرد خدايي،
نئچون سالدي جهانا بو صدايي.
«ولي»دن صادر اولماز بو عيبارت،
كيم اؤلمك اولا جورمينه كفارت.
و يا بير يئرده دئيير:
آنا دئيين بونو اونوتما يانا،
«ولي» اونوتما بو آراني يانا.
بو يئرده اكتفا ائت بو مقاله،
گيره‌ييم يئنه بير داخي سواله.
بيز كلاسيك توركجه قايناقلاردا «الوان» لقبي‌نين شاعيرين آديندان قاباق گلمه‌سيني سبب سيز حساب ائده بيلميريك. اودور كي، اونو شيخ الوان ولي شيرازي آدلانديريريق. اثردن دونيا كيتابخانالاريندا ساخلانيلان اوتوز اليازماسي‌نين قارشيليقلي علمي تنقيدي متني‌نين نشرينده، بير چوخ مجهوللار حل اولماليدير.
اونون «گلشن راز شبستري»نين ترجمه‌سينه علاوه يازميش اولدوغو شعرلرينده، زامانين آيدين و كوتله ديلينده ياشايان كلمه‌لري ايشله‌نيلميشدير. بو كلمه‌لر، دده‌قورقود بويلاري، يونس امره، قوشچو اوغلو و قاضي برهان الدين‌ين شعر ديلينده‌كي كلمه‌لردير.
اونون شعر ديلينده، توركجه سوزلر اوينايير، ريتم و آهنگه اويغون شعريت جذبه‌سي تاپير. اويناق، ريتميك و آهنگداردير. او، علمي- ديلي تماميله خلق ديلينه و جانلي توركجه‌يه ياخينلاشديرير.
آشاغيداكي مستزاددا ايشلنن 75 كلمه‌نين 50 سي توركجه‌دير:
بير غنچه‌ني سئوديم كي بوگون گوللر ايچينده، جانانه‌ليك ائيلر.
باغلاندي كونول زولفونه سونبوللر ايچينده، ديوانه‌ليك ائير.
يارديم تنيمي شانه كيمي باشدان آياغا، اي دان يئلي بير سور،
كيمدير كي اونون زولفونه كونوللر ايچينده، كيم شانه‌ليك ائيلر.
گوزه‌للر آنين حوسنو قاتيندا قامو يوخسول، بو گورمك ايله باي،
بير شاه جهاندير كي بوگون قوللار ايچينده، مردانه‌ليك ائيلر.
شيرازي اسير اولاليدان بري دير، آنين، اوش گئجه و گوندوز،
ايتلري ايله بئله ياتير كوللر ايچينده، يارانه‌ليك ائيلر.
يوخاريدا قئيد ائتديگيميز كيمي، فلسفي دوشونجه‌لري، توركجه‌ده ساغلام ديل ايله سويله‌يه بيلن شيرازي، ديليميزين ان گوزل فلسفي سويله‌ييشيني يارادا بيلميشدير. ميثال اولاراق، روحون انساندا بدنلنمه‌سي حادثه‌سيني، بئله‌ديله گتيرير:
فلك‌لردن گذر ائيله‌دي جانين،
زمينينده بولوندو بو زامانين.
نباتا، معدنه، حئيوانا گلدين،
بولاردان كئچدين و انسانا گلدين.
دئدگيميز كيمي، الوان شيرازي يالنيز بير ترجمه‌چي دگيلدير. او، «محي الدين عربي»دن، «خواجه احمد يسوي»دن، «شيخ عطار»دان و «مولانا»دان بعضي فيكيرلر و ايلهاملار آلاراق، همده اثرين حقيقي مولفي‌نين اورتاغي اولموش، آديني حورمتله چكديگي شيخ محمودون اثريني داها تفصيلات ايله توركجه‌ميزه نقل ائتميشدير.
وصفي ماهير قوجا توركون «تورك ادبياتي تاريخي» كيتابيندا يازديغينا گوره: «شيخ الوان شيرازي طرفيندن يازيلان توركجه گلشن رازي، شعريميزين تكامولونده يئر آلان تاليف بير نظم اثري اولاراق مطالعه ائده بيله‌ريك.»
اثر، ديليميزين 9 نجو عصرده ادبي كوكلنمه‌سينده مهم رول اويناميشدير. اثرده چوخلو جوشغون و اويناق مصراعلاردا وار كي فلسفي بحثلري، قورو بيان شيوه‌سيندن قورتارير:
بو مي‌دن دنگ و حئيراندير ملك‌لر،
بو مي دن مست و شئيدادير فلك‌لر.
طلب ائيله، ايچ اول مي‌دن پياپي،
كي فارغدير قامو ساغردن اول مي.
ايچر ساقي‌سين اول مي، مي دئيينجه،
نه ساغر قور نه مجليس هئي دئيينجه.
شيخ ولي شيرازي اثرين بير يئرينده دئيير:
آغي قيلديم قارا، قاراردي آغيم،
ياخيندير اللي‌يه ائرمگه چاغيم.
يئرين يوزو دولو قويون قوزويدو،
سكيز يوز و ايگيرمي دوققوز ايدي.
بورادان آنلاشيليركي او 829 – نجو ايلده اثريني يازيب قورتارميشدير و همين ايلده ياشي اللي‌يه ياخينلاشميشدير. بئله‌ليكله دئيه بيله‌ريك كي او تخمينا هيجري 779- نجو ايلده دونيايا گلميشدير. اونون اؤلوم تاريخي بيزه معلوم اولماسادا، اونون بعضي آراشديريجيلارين نظرينه گوره 70 ايل ياشاماسي ظن ائديلمكده‌دير. بئله‌ليكله 850- نجي ايلي شاعيرين وفات ايلي كيمي قئيد ائده‌بيله‌ريك.
اثرده، اوخوجو آشاغيداكي سواللارايله أوز- أوز گلير:
دوشونجه نه‌دير؟ من كيمم؟ ايچ عالميمه سفر ائتمه نه‌دئمكدير؟ مسافر كيمدير؟ حقيقي انسان كيمه دئيرلر؟ وحدتين سيرّينه كيم واقيف اولار؟ اناالحق سوزو هانسي نقطه اوچوندور؟ انسانين آللاهي تانيماسي نئجه اولار؟ مخلوقون سلوكو نئجه اولار؟ وصال نه‌دير؟ علم صاحيبي اولان وارليق نئجه دريادير؟ او نئجه جزء دور كي كلّدن بويوكدور؟ قديم ايله محدث نئجه بيري- بيريندن آيريلدي؟ خط و خال و چشم و ابرو سوزلري‌نين معناسي نه‌دير؟
شبستري بو سواللارا «ابن عربي» و «مولوي» گوزلرينه بنزر بير گؤز ايله باخير. لاكين فلسفه‌ني ردّ ائدير، عرشي سكگيزينجي و كورسونو دوققوزونجو گوي طبقه‌سي كيمي قبول ائدير، هيولادان، جوهر و عرض‌دن دانيشير و اونلارين تاويل‌لري حاققيندادا بحث ائدير.