ياشاسين
- 1-
دوزگون اي صاحب هر فن و بيان،
اي سخن‌پرور استاد زبان!
سنه فخر ائيلير آذربايجان،
نه قده‌ر حوصله وار سنده مگر؟
ياراديرسان نه قده‌ر سانسيز اثر.
ملت توركه بؤيوك زينت سن،
او بؤيوك ملته بير قدرت سن،
ياشا، دونيادا بيزه عزت سن،
قويموسان غصه‌لي دللر سيخيلا،
بوسبوتون دهرده گوللر سيخيلا.
يازيسان هر ائل اوچون بير نامه،
سن يازانلار سالوري هنگامه،
سنه لايق‌دي دئماق علامه،
هاني سن تك بيري بو دونياده،
سني الله يارادوب آزاده.
سن تك اوستاد بو دؤوراندا يوخ،
ملك تبريزده، تهراندا يوخ،
قسم آللاها بو ايراندا يوخ!
بيلمير ايرانلي سنين قدرتيوي
علميوي، معرفت و قيمتيوي
گاه فرهنگيده تحقيق ائديسن،
ريشه‌ي مطلبه گاهي گئديسن،
كيم بيلير علم و عملده نئديسن،
او اثرلر كه ديريلديرسن عزيز،
اونو بيلمزدي مگر اهل تميز.
چوخ كتيبه بيزه اعلان ائديسن،
متن تاريخي نمايان ائديسن،
عالمي واله و حيران ايديسن،
كول تيكن كيمدي ندي بو گؤزل آد
اوني خلقه قلمين ائيله‌دي ياد
بيلگه خاتون كيم ايدي حاكيمدي،
بيليريك تان يوقوق عالمدي،
يعني فرهنگه بولار خاديمدي.
بولاري ايندي ديريلدير قلمين
اسه‌جك تا دم محشر علمين.
نه قده‌ر واردي فلك، واردي جهان،
نه قده‌ر وار يئر و گؤي، دور زمان،
قلميندن قالاجاق خلقه نشان!
دئيه‌جك آي ياشاسين، گون ياشاسين،
ياشاسين حضرت دوزگون ياشاسين!
سن نه دوكتور سن ايا مرد عجيب،
سني الله ياراديب روحه طبيب.
خدماتين بيلر عالمده نجيب،
او نجيبي كه اؤزو ماهر اولا
نه علومي كيمي بير شاعر اولا.
- 2 -
قارا مجموعه اثردي بؤيوك،
شيخ صفي اثري، گؤزل بير مضمون!
وئريري گون كيمي عالمه نشان،
اونو بؤيوك بير عالم چون درّ مكنون.
دكتر صديق‌دور اهل صداقت،
دئييرلر آدينا ديللرده دوزگون.
تبريزين عزّتي، تبريز شرفي،
بلادان حق اونو ائيله‌سين مصون.
- 3-
اردبيل شهرينين اوجاليب آدي
شيخ صفي به‌زه‌ييب دارالارشادي.
اؤرگه‌ديب امّته هر بير زادي
استقلال او وئريب آذربايجانا،
ابدي شرفدير مُلك ايرانا.
شيخ صفي جنتدن دور گل بويانا،
باخ گيلن دوزگونه، آذربايجانا.
گؤر نئجه آديوي چكير مئيدانا
قدريني بيلميري بيلمه‌سين دشمن،
اولوبدو اونيله معطر گلشن.
بو دوزگون دوزگوندي علم و عملده،
اوستادلار اوستادي ازبردي ديلده.
داياخدي توركلره دئييب ازلده
عؤمرونو سوروري بو خدمتيله
اوجالدير اؤز خلقين جسارتيله.
دوزگونون شيوه‌سي گؤزلدي گؤزل
گر يازا قصيده، گر دئيه غزل
بلادان ساخلاسين حيّ لم يزل
كلمه‌ني اوزاتماز مدّيندن آرتيق
اوجاتماز بيريني حدّيندن آرتيق.
- 4 -
شيخ صفي خدمتين يئتيردي باشا،
دوشمنين باشيني دولادي داشا.
قارا مجموعه‌يه ائيله تماشا
گؤروسن اوجالديب اوجاني ايلي،
بسله‌ييب جام كيمي شاه اسماعيلي.