معلم «دوزگون»ون بؤيوكلوگوندن
نه دئييم دئييلمز، كلاميم سينار
معلم توصيفين، عشقين وصفيني
سؤيله‌يه بيلمرم، مراميم سينار.
دئيير بؤيوكلنر بؤيوك ياد ائدن
بؤيوكلر دونياسي دالينجا گئدن
«دوزگون»وم! بؤيوكلر دونياسين گودن
بؤيوكلوگونوزدن تماميم سينار.
«نسيمي»دن بيزه پنجره آچديز
«فضولي»نين نورون اوره‌گه ساچديز
«نباتي» ايله بيزي اوچوردوب، اوچدوز
سيزله يالان- يالان ايناميم سينار.
صدقين آغ آتيني مينيب، گزه‌رسيز
غرورون، حسدين دئوين ازه‌رسيز
وجودوز نورو ايله دهري بزه‌رسيز
سيزين ايشيغيزلا ظلاميم سينار.
ياز بولودو كيمي اليز آچيق‌دير
دوستلارا قوجاغيز، قولوز آچيق‌دير
هميشه محبت گولوز آچيق‌دير
كيم دئير سيز ايله سلاميم سينار.
عزيزيم بو دونيا كيملره قالدي،
بونجا دگيشيليب، دولوب، بوشالدي
اوندان علاوه كي «دوزگون» آد آلدي
من ده دوزگون اولسام حراميم سينار.
اوستاديم! تجليليز مبارك اولسون
عمروزون آغاجي بار ايله دولسون
«هادي»دن سيز اوچون نغمه قوشولسون
خواصيم يوكسليب، عواميم سينار.