حق، یار اولسون!
ائل شاعیری «گولدورلو ولی»نین شعرلرینی احتوا ائدن ایکینجی مجموعه‌نین چاغداش اوُخوجو الینه چاتدیرما و دوزه‌لمیش آپارما بوُرجونو، یئنه‌ده معاصر ادیب و شاعیریمیز «گونئیلی» بوینونا آلمیشیدیر. عرفانی رمز و راز ایله دولو اولان اینجه دوُیغولو و لطافت دولو بیر شعر توپلوسونو نشره حاضیرلاما، آسان ایش دگیلدیر. شاعیر دونیا گؤروشونده اولان معنوی و باطینی حسّلر، اونون طبیعته باخیشدا و توپلوم یاشاییشی‌نین زاویه‌لرینه آخیشیندا دا اؤزدونو ایچ حسلریندن اوُزاقدا ساخلایا بیلمز. اصلینده اینجه صنعت و اونون داها گونده گئدن یؤنو شعر ایسه، همین ایچ حسّلردن دوغان بیر گوجدور. تأثیر ائدیجی و تلاطم یارادیجی بیر قوّه‌دیر.
آذربایجان تاریخینده، مدنی و سیاسی قالخینمالارا سبب اولان و تاریخ ائل دیزینی چالخالاندیران و معنوی گوجلریمزه یؤن و جهت وئرن «حروفیه» مکتبی نین دوامچی سی ساییلان «اهل حق» درویشلیگینه منسوب «گولدورلو» ولی بئله بیر قوّه زنجیره‌سی‌نین حلقه لریندن بیریسی ساییلیر. حضرت «بایرک قوُشچو اوغلو» و «موُلانا حکیم سیّد ابوالقاسم نباتی» کیمی، دیلینده فورما نه قده‌ر درین، حکمتلی و فلسفی‌دیر. شاعیر، بوُرادا، یانیندا کئچن هر شئیه باطینی حسّلر و معنوی دویغولار ایله یاناشیر. اونون دیلینده اوینایان و آخان هر سؤز جوک، معنا یوکو داشییر و بئله بیر یوک داشیماق ایله شرفله‌نیر. شاعیر دیلینده سؤزجوک و کلمه دوُیغو فخری و آنلام شرفی ایله یوکسلیر. بوردا، ساده‌لیک و صمیمی‌لیک، درین معنویت و ایچدنلیگه قاب اولور؛ یوکسیک معنا، ساده و گؤزَل و آخیجی بیر سؤزجوکلر فورماسینا یئرله‌شیر. شیخ صفی‌الدین اردبیلی‌نین «واللی،بالدی!» غزلی و حکیم نباتی‌نین «گلسین، گلمه‌سین؟» قوشماسی، هر نه قدر ساده و معنا دنیزینی اؤز قالیبیندا یئرلشدیره بیلمیشدیر.
من، گولدورلو ولی‌نین شعرلرینه بئله باخیرام. اونون هر سؤزونده و هر کلامیندا معنوی حسّلر آردینجایام. ائله اونا گؤره‌ده ادیبیمیز «گونئیلی»نین دوزه لیشچی‌لیگی‌نی، بیر نوع تنقیدی- علمی متن حاضیرلاما ساییرام. عارف شاعیرین معنا دونیاسینی ادراک ائتمه، قابلیت و یئته‌نک و لیاقتینه صاحیب چیخا بیلن هر اوخوجونو بو کیتابی اله آلماسی ایچون تبریک ائدیرم.
سؤز یوخ کی «گولدورلو ولی»نین «قارتال قایناغی» حساب ائتدیگی اورَکده شعریت یاتاغیندا، کیم بیلیر بلکه‌ده گله‌جکده مظلوم ائللریمیزین معنوی ده‌یرلرینی قوروماق ایچون، اؤزو کیمی ناموسلو قارتاللار قالخاجاقلار، گنجلیگیمیزین باشلادیغی مدنی قالخینما داوارانیشلارینی گؤزله‌نیلن مثبت ده‌یرلی نتیجه‌لر چاتدایراجاقلار.