چاغداش فارس شعری‌نین گؤزل نمونه‌لرینی دیلیمیزه قازاندیرماق ایندی بیزیم اۆچۆن مهم و اؤنملی بیر ایشدیر.
اللی ایله یاخیندیر کی ادیب و شاعیرلریمیز بو مدنی قالخینمایا قوشولموش و بیر چوخ مترقی شاعیرلرین شعرلرینی تۆرکجه‌میزه چئویرمیشلر. 1340ـ اینجی
ایللرده رحمتلی صمد بهرنگی و اونون قلم داشلاری؛ احمد شاملو، مهدی اخوان ثالث، فروغ فرخ زاد، سیاوش کسرایی و باشقا شاعیرلرین شعر مجموعه‌لریندن سئچدیکلری گؤزل نمونه‌لری ترجمه ائتمیشلر. یاخین ایللرده بو ایش اؤزۆنه داهادا سۆرعت آلمیشدیر وهمین موضوعدا مجموعه‌لر نشر ائدیلمیشدیر.
البته کی بو ایشده موفق اولماق اۆچۆن، ترجمه‌چی شاعیر هر ایکی دیله مسلط اولمالیدیر. الینیزده اولان کیچیک مجموعه‌نین ترتیب ائده‌نی، «ارکین» تخلّصو ایله تۆرکجه و فارسجا بدیعی و رومانتیک حال و هوالی شعرلر یازان مهندس محمد باقر باقری، بیر طرفدن معمارلیق ساحه‌سینده دگرلی و قیمتلی آبیده‌لر یادگار قویور و باشقا طرفدن اینجه روحو و لطیف طبعی ایله موسیقی و شعر دونیاسینا اینجیلر بخش ائدیر. سنتی موسیقی ردیفلری ایله یاخیندان تانیش اولان شاعیرین موسیقایی ایقاعات ایله یاناشی عروضون افاعیلی قایدالاری ایله‌ده عالیمانه تانیشلیقی واردیر.
چاغداش فارس شعریندن سئچدیگی نمونه‌لرین ترجمه‌سینده آخیجیلیق و لطافت، همین تانیشلیقدان قایناقلانیر. بو ترجمه‌لر بعضاً اصلیندن داها گؤزل و لطیف دۆشمۆشدور. ترجمه‌چی‌نین ایشی‌نین باشقا مزیتی، اونون تبریز لهجه‌سینه اهمیت وئرمه‌سیدیر. بیلیریک تبریز لهجه‌سی تۆرکجه دیلچیلیکده، طنزلر و مثللر خزینه‌سی آدلانیر، اؤزۆنه مخصوص تلفظ و دانیشیق شیوه‌سی‌ده واردیر.
شاعیر ارکین: نمنییه، چؤنده‌رنمیری، کئچیردوخ، گئشدیم، کیمی بو شیوه‌یه مخصوص سؤرجوکلری شعرده ایشلتمکله، دقت چکیر.
من اومید ائدیرم کی ارکین بوندان سونرادا یئنی بدیعی اثرلری ایله چاغداش ادبیاتیمیزی زنگینلمگه چالیشاجاقدیر.