شهریار، ناظیر
آی اوجا داغلارین مسکنی تبریز،
آصلانلار ، قافلانلار ماُمنی تبریز،
تانیرام چوخداندیر، من، سنی تبریز،
چاغیردین بالانی "رحمت چوُلونه " ،
آرتیردین اونو - دا ، کوُچه ن ائلینه!
شاعیرلر ائوینده ن بیر قدر اوزاق،
خاقانی، قطراندان، چوخدا یوخ ایراق،
ائیله دین اونودا بورادا مایاق،
بیریاندا "شهریار" بیریاندا "ناظیر " ،
اولدولار موُحتشم تاریخه ناظیر!
خوشکَناب باغینین صولغون لالاسی،
گئییندی عافیَت، شنلیک لیباسی،
کیملییین ثبت ائتدی، حیدر باباسی،-
شهریار اوغلونون شعریّتی له،
تانیندی دونیایا، قطعیّیَت ایله!
دونیانین، دوز داغی، نَمَکیستانی ،
دَنیزلر جانانی، دَنیزلر جانی،
اورمویلا، تبریزین، بیرلیک پیمانی،
چَکیلدی تصویره،مینیاتورایا...
یاییلدی عنوانی بوتون دونیایا!
"ناظیر"ین سحیرکار، کابینه سینده،
خیال مرکَبینین شورلو سسینده ،
یاراندی اورمییه دریاچه سینده،-
بیر قورقود لیسانلی، پری چهره یَل،
ملاحت دریاسی، مزه سی: عسل!
شانلی حیدر بابا، دوُندو بایراغا،
دَنیزده باشلادی دالغالانماغا ،
بخش ائتدی شهریار: جان ، جانسیز داغا ،
"ناظیر"ده دیریتدی آذربایجانین،
دوز ایچره بوغولموش: "آغ قیزیل" داغین!
اورمو دریاچه سی، حیدر بابامیز ،
خوشکَناب، شبیستر، شیبلی، اَمره قیز،
وطنین سماسین، مه سیز، دومانسیز،
یاناشی دایانیب، چییین - چییینه،
ائتدیلر حریّت فضاسی، یئنه!
"آیدین تبریزلی"ده، اولور ایمتاحان،
نغمه لی سَطیرلر یازیر آن با آن،
غیرت له، شرف له، هرگون، هر زامان،
قورویور جان کیمی حیدر بابانی،
آغ قیزیل ده نیزی: شرفخانانی!
آیدین تبریزلی(س.ب)
_________
۱- شاعیرلر ائوی: مقبره الشعرا
۲- رحمت چوُلو: وادی رحمت
۳- مایاق، (مایاک): چراغ دریایی، فانوس دریایی.