«روز شعر و ادب» شهریارین مقامینا لایق دیر

 

 

دکتر صدیق «روز شعر و ادب» عنوانی نی شهریارین آغیرلاما گونونه لایق آد بیلدی و دئدی: ادبیات دیله محدود اولا بیلمز.
بئشینجی میلتلر آراسی شهریار کنگره سی نین ایلکین اوتورمو قورولدو.
بو اوتوروم جمعه، خرداد آیی نین 23 نجی گونو ساعات 10 دان، 13 قده ر تهران دا باباطاهر هتلینین کنفرانس سالونوندا «بنیاد شهریار» تشبثی ایله برپا ائدیلدی.
بو اوتوروم بنیاد شهریارین امناء هیاتی نین عضولری و علمی شوراسی و بیر نئچه اسلامی مجلس شوراسی نماینده لری اشتراکی ایله قورولدو.
ایلک اؤنجه آقای دکتر نوروزی بنیاد شهریارین باشچی سی دانیشدی. او استاد شهریارین آغیرلاماسینی مقام معظم رهبری نین اؤنه سورولن نظری حساب ائتدی.
بو اوتورومدا حجت الاسلام بیگی، دکتر فتح الهی، دکتر امین لو، دکتر سیامی، استاد کوثر مرندلی، استاد شهرک میرزا طهماسبی و باشقالاری اشتراک ائتمیشدیرلر.
بو مجلسی حجت الاسلام بیگی افتتاح ائتدی. سونرا، اوستاد دکتر حسین محمدزاده صدیق دانیشدی. دکتر صدیق «روز شعر و ادب» عنوانی نی شهریارین آغیرلاما گونونه لایق آد بیلدی و دئدی: ادبیات دیله محدود اولا بیلمز.
دکتر حسین محمدزاده صدیق بو اوتورومدا دئدی: مرحوم شهریار ادبیات خادمی و ادب قهرمانی ایدی. بس اوندا ادبیات نه ائمکدیر؟ مسلمانلار ملتللری آراسېندا بوتون احساسی و عاطفی نظم و نثر اثرلرنین تۏپلوسونا «ادبیات» آدې وئریلیر. انگلیسلر اونا Literature دئییرلر. مثلاً English Literature فرانسالېلار لیتراتور Literatur آد وئرمیشلر. روسلار ایسه تۆرکجهدن آلیب «یازیکا» آدلاندېرمېشلار. یعنی یازیلان شئیلر. آوروپا دیللریندهده Litre سؤزۆ، حرف و صوت معناسېندادیر بونلارین هئچ بیرینده، وئریلن آدلار، یازانلاری و شاعرلری ادب و فضلیته ساری سوق وئرمهییر. دکتر صدیق ایضاح وئردی: یعنی «ادب» ایله یازماق الزام آور دگیلدیر. ویکتور هوگو، پوشکین، دانته، شکسپیر، بالزاک، استاندال، جک لندن، لرد بایرون و هر باشقا بیر کس داها احساس و عاطفه و دوشونجهسیندن قایناقلانان اثر یاراتماق فیکرینده دیرلر. لاکن بیز «ادبیات» دئینده بو سؤزده «ادب» کلمهی اولدوغو اوچون، الینه قلم آلان هر بیر شاعر و یازیچی اؤزونو ادبی مراعات ائتمگه ملزم بیلیر و بونا گؤرهدیرکی سناییلر، فضولیلر، عطارلار، نسیمیلر و یوزلر اخلاقیات و فضلیت شاعری تاپیلیر. اسلامدان قاباق بئله دگیلدیر. مثال اوچون ایراندا «اردای ویرافنامه» کیمی اثرلر یارانیردی که ایندی اونو اوخوماق و تبلیغ ائتمهده هر کس حیا ائدیر و اوتانیز. حالبوکی هر کس عطارین «اسرارنامه»سین و فضولینین «ساقینامه»سین افتخار ایله تبلیغ ائده بیلیر. بو نعمتی اسلام بیزه باغیشلامیشدیر. شهریاریدا بیر ادبیات تمثیلچیسی و ادبیات خادمی و ادبیات قهرمان حساب ائدیریک. او دیل نمایندهسی یوخ، بلکه «ادب» نمایندهسیدیر. اونون وفات گونونو «روز شعر و ادب فارسی» آدلاندیرماق اونا جفادیر. بو گونون آدی «روز شعر و ادب» دیر و شعر ایله ادبین سرحد تانیماماسی اوچون، مرحوم شهریاری بو دیلین یا او دیلین شاعری یوخ، بلکه بوتون بشریت اوچون ادب تمثیلچیسی آدلاندیریریق، ائله بونا گؤرهدیرکی دنیا ملتلری اونو آلقیشلاییرلار.

نوشتن دیدگاه


تصویر امنیتی
تصویر امنیتی جدید