«دکتر ح. م. صدیق»ین «سهند» هفته‌لیگینده یازدیغی یازیلار آراسیندان.
فلسطین مسلمان خلقی‌نین «انتفاضه» آدلی قیامی‌نین 4 ـنجو ایل دؤنومو ایله علاقه‌دار، بو سایدان باشلایاراق، الیمیزده اولان فلسطینلی شاعرلرین شعرلری‌نین ترجمه‌سین تقدیم ائده‌جه‌ییک. سیزده بیزیم بو حرکتیمیزه قاتیلابیلرسینیز. فلسطین شعرینده نمونه‌لر ترجمه ائتمکله برابر، بیزه ترجمه اوچون فارسجا و یا باشقا دیللرده الینیزده اولان فلسطین معاصر شعر قایناقلارین گؤندره بیلرسینیز. فلسطین انقلابی ادبیاتین دیلیمیزه قازاندیرماق، بیر انقلابی و ملی بورجدور.
محمود درویش
محمود درویش، فلسطینلی شاعر 1941 ایلینده «عاققا» یاخین‌لاریندا «ال برواح» کندینده دوغولدور. 1948 ده دوغما کندی یئرله بیر ائدیلنده، عایله‌سیله بیرلیکده قاچیب لبنان داغلارینی کئچمگه مجبور اولدو. سونرادان یازدیغی شعرلرده، بوتون بو غارت، ظلم، عسکر و پلیس باسقینین ایزلری گؤرنور.
شعرلرینی نشر ائتدیگی واختلاردا ال اروح (تورپاق) جبهه‌سینین چالیشمالارینا قوشولدو. فلسطین مقاومت شعری، بو جبهه‌نین بولتن و مجموعه‌لرینده قول بوداق آچدی.
محمود درویش 1961 ده، 1965، 1967 ده حبس ائدیلدی. «فلسطینلی سئوگیلی» آدلی بیر شعر کتابی واردیر. یاخین شرق ادبیات و مطبوعاتلاردا فلسطین مبارزه شعری‌نین باشچیلاریندان ساییلیر.
سیجیللیم باطل اولماز
کؤتوکده یازیلمیشام:
عربم، مسلمانام.
سیجیللیمین نمره‌سی اللی مین
سکگیز اوشاغیم وار،
دوققوزونجوسو یولدا،
یازدان سونرا بوردا،
غضبله‌نیرمی سن؟
کؤتوکده یازیملیشام
عربم، مسلمانام
بیر ایشیم وار، چالیشیرام
آرخاداشلاریم وار، دردچکن،
سکگیزده اوشاغیم.
داش‌دان چیخاریرام چؤره‌کلرینی،
اوستلرینی باشلارینی، دفترلرینی
داش‌دان چیخاریرام.
دیله‌نمیرم قاپی- قاپی،
اولمورام ایکی قات
آستاناندا سنین.
غضبله‌نیرمی سن؟
کؤتوکده یازیلمیشام.
عربم، مسلمانام
دؤزوملویم
غضبله قاینایان تورپاقلاردا
سالمیشام کؤکلریمی.
چاغلاردان چوخ اوزاقلارا باغلی
آتام، منیم،
یوز ایللرین دوغوشوندان چوخ اوزاقلارا،
سرولردن، زیتونلاردان چوخ اوزاقلارا،
بوتون بیتگیلردن چوخ اوزاقلارا باغلی.
خان آغالاردان دگیل،
قاراجوت سوره‌نلردن.
منیم بابام‌دا کندلیدیر.
باشیمیزی سوخاجاق بیر داخما
منیم یووام،
قامیشلاردان، بوداقلاردان.
فرحلی‌میسن منیم بو حالیمدان؟
بیر میللتم من.
کؤتوکده یازیلمیشام.
عربم، مسلمانام.
ساچلار، قارا.
گؤزلر، قهوه رنگی،
مخصوص علامت‌لر:
آلنیندا بیر چاتقی.
ال ایچی دنیز قابیغینین ایچی کیمی قیرمیزی.
حس‌دن سالیر دوتدوغو الی بو اللر.
هم زیتون یاغینی،
هم‌ده کهلیک اوتونو سئوه‌رم چوخ
آختاران تاپار منی
بیر ایتگین لندده،
آدسیز یوللاردا اونودولموش.
تارلالاردا تر تؤکر انسان‌لاری،
داش معدنلرینده تر تؤکر،
آرزولاییر انسانلار
انسان کیمی یاشاماغی.
کؤتوکده یازیلمیشام
عربم، مسلمانام
آتالاریمین اوزوم باغلارینی سن آلدین الیمدن،
اوشاقلاریم‌لا اکدیگیم تورپاغی سن آلدین.
بورخدین بو داشلاری
بیزه، اوشاقلاریمیزا.
آلاجاق‌ده ییرلر
حکومتین سنین
الیمیزدن بو داشلاری‌دا،
دوغرومی؟
بیر داها دئییرم!
بیر داها!
کؤتوکده یازیلمیشام.
بیرینجی صحیفه‌نین تا باشینادک.
نفرت ائتمرم انسانلاردان.
تجاوز ائتمرم هئچ کیمسه‌یه.
لاکین آج قویارلارسا منی،
قویارلارسا یالین، چیلپاق،
یئیرم اتینی منی غارت ائده‌نین،
هم‌ده یئیرم چیی- چیی
چکین منیم غضبیمدن
توخونما غروروما.
عربم، مسلمانام،
سیجیللیم باطیل اولماز!
چئویرن: دکتر ح. م. صدیق
سهند هفته‌لیگی، 39 ـونجو سای، 21 آذر 1369
دیدگاه‌ها
یورولمیاسیز
سیز فضولینین تصحیح اولونموش کیتابلاریندان چوخون دانلودا قویوبسوز آمما اصلیسین قویمویوبسوز
اگر ایمکانی اولسا لطف ائله یین "لئیلی و مجنون"کیتابیندا قویون
اللریز آغریماسین
خوراک‌خوان (آراس‌اس) دیدگاه‌های این محتوا