گيزلي خياللار شاعيري
شعر، اصلينده عادي دانيشيقدا ديله گتيره بيلمه‌ديگيميزلري، تأثير ائديجي بير شيوه ايله بيان ائتمك اوچون يارانميشدير. ياخشي شعر ايسه اودور كي، عادي دانيشيق و عادي ديل عليهينه عصيان قيلسين و شاعيري ديله گله بيلمه‌ين سؤزلري دئمگه وادار ائتسين.
بئله شعرين سؤزجوكلري، جومله بيچيمي، بيان شيوه‌سي و هر نه‌يي بكر و آري و دالغالي اولاجاقدير. بئله شعره ايسه هر قاليبدا اولور اولسون، «يئني شعر» آدي وئرمك اولار و شاعيرينه‌ده يئنيچي دئمك مومكون گله‌جكدير. بئله شاعير، هم درينليكده و همده سطحده حركت ائدير، ايلهام حالتينده گئرچكليگه و حقيقته ال تاپير و خيال يئلكني ايله گئرچك دونيادا اوچور و عادي انسانلار اوچون «معمالار» يارادير.
الينيزده اولان شعر مجموعه‌سي‌نين شاعيري «آنير قوجام» بئله بير شاعير دير. او شعرلرينده يئر به يئر عيني و ذهني تصويرلر وئرير.
شاعيرين وئرديگي تصويرلرده، بير گيزلي خيال هاله‌سي ياتميشدير. بو گيزلي خيال هاله‌سيني تاپماق و تانيماق، عادي اوخوجويا البته كي چتيندير. شاعير اونونلا ياشاميشدير، همده ايچ دونياسيندا.
دئمك ايسته‌ييرم كي بو شاعيرين شعرلريني باشا دوشمك و دوشونمك اوچون اونون ايچ دونياسينا جومماق و بو دونياني تانيماق گره‌كدير.
شاعيرين شعرلرينده وئرديگي تصويرلر، البته كي عيني تصويرلرديرلر. تاماميله عينيتدن دوغولموشدور. هرگون راست گلديگيميز ياغيشدير، چال كيشي دير، اولدوزدور، ايلديريم‌دير، آيدير و . . .
لاكين بونلارين هره‌سينده بير ايچ معنادا واردير، ياغيشدان مقصد، «رحمت الهي»، چال كيشي‌دن منظور «پير كامل»، اولدوزدان هدف «يول گؤسترن علامت»، ايلديريمدان غرض، «قبض و بسط عرفاني» و بو كيمي مضمونلاردير. وئرديگي كيچيجيك تصويرلرده بعضن بير دريا معنا واردير:
ياشيد مئشه‌لر برابر يئتمه‌ديلر:
بيريندن چاي گليردي لام،
بيرينه سيسقا بولاق شوتويوردو شيلتاق!
بو قيسا شعرده ياراديليش اسراريندان سؤز گئديرمي؟ جوره- جوره و فرقلي يئتيشن ايكي قارداشدانمي دانيشيلير؟ «جبر و اختيار» فلسفي بحثي‌نين چالارلاريمي آچيلير؟ هر نه ايسه، شاعيرين شعريني باشا دوشمك اوچون، چوخ زاد اؤيرنمك لازيم گلير.
او دئينده:
اسكي قالاني
آچان من اولدوم.
بلكه «اسكي قالا»دان قصدي، انسانين ايچ دونياسيدير. بئله نظره گلير كي او، گئرچك بير وارليغا چاتماق اوچون، جان آتير و نهايت‌‌سيزليگه يول تاپير و ادعا ائدير كي:
من سن اولدوم
اسكي قالاني
آچان مني اولدوم . . .
شاعيرين قهرماني ايچ دونيالاردا گزير، او، اؤز قهرمانينا «من» خطاب ائدير. بو «من» گاه‌دا حققين باغيندا بيتن بير سيرردير. شاعير عرفاني «من» صاحيبيدير. اونون مني «تكرار، تكرار» شعرينده ادعا ائدير كي چال كيشيلرين (= كاميل پيرلرين) روحوندان سوزولوب، قدسي نسيم الي ايله عالي رنگ اولان زوموررود رنگي ايله بويانميشدير و باهارا چاتميشدير.
شاعيرين بو شعرينده همده سياسي بير ادعا واردير. او، ادعا ائدير كي بويانديغي رنگ، هر رنگدن اوستوندور، چونكي بو عالي رنگ، اونو قاناليقلارا سوق ائتميشدير، هم اونو كئفلنديرميش، مست ائتميش و «رؤيا»لارين دؤشلريندن اميزديرميشدير و بو موهبت ايسه اولدوزلار (= يول گؤسترن نيشانه‌لر) ايله گئرچكلشميشدير. بئله‌ليكله اويانديقجا (=كاميل اولدوقدان سونرا)، اؤزو ايله آشيناليق (= اؤزون تانيما) سالميشدير و ياغيشدان- ايلديريمدان (= قبض و بسط‌دن) سيلينميشدير و آغير ساواش (= مراقبت نفس) گونلريني آرخايا قويموش، دينجه‌لنده (= كمالا يئتيشنده) آپايدين چال كيشي (= نوراني كاميل پير) كيمي اولموشدور.
بو شعرده هر كلمه‌نين اسرار انگيز معناسي واردير، چال كيشي (= پير)، اولدوز (= دليل و راهبر)، ياغيش (= قبض)، ايلديريم (= بسط)، ياي (= كمال)، آغير ساواش (= جنگ اكبر، نفسدن مراقبت)، غازي (= ساليك) و بو كيمي تعبيرلري، باشا دوشمه‌دن، كيمسه شعرين معنا و ايچه‌ريگيني باشا دوشه بيلمز.
شاعيرين شعرلريني باشا دوشمك اوچون، اونون ديلين تاپماق لازيمدير. من آنيرقوجام تخلص ائدن «احد زماني»ني 1362- نجي ايلدن تانيييرام، تبريز دانشگاهيندا «جامعه‌شناسي» رشته‌سينده اؤيره‌نجي اولدوغو زاماندان، «اطلاعات» گؤنده‌ليگي‌نين تبريز شعبه‌سينده توركجه بؤلوم اداره ائتديگي واختدان. او زامانلار او، اؤزو دئميشكن «آغير ساواشلار غازيسي» ايدي و سونرا اؤز ديلي ايله «باغيشلا سئوگيليم» شعريله دئسك:
گلديم باغيندا بيتديم،
او باغدا راز اولدوم.
آنيرقوجام بورادا اؤزونو و دئديگيميز او «مني» حققين باغيندا بيتن بير سيرر حساب ائدير. بونا گؤره‌ده ادعا ائدريك كي اونون شعريني دريندن باشا دوشمك ايسته‌ين هر اوخوجونون عرفان دونياسي و عارفلرين باشلارينا گلن ماجرالاردان خبردار اولماسي لازمدير. آشاغيداكي مصراعلاري اوخويان:
قورخمام كسيك باشدان يار جفاسيندان،
چون حدسيز گؤرموشم آل وفاسيندان.
بونونلا ال چكمه‌م تمناسيندان،
دئسين نه دئييرسه داش اورك اغيار.
«كسيك باش» تعبيريني، باشا دوشمك اوچون گرچي شاعير خفيف بير قرينه‌لرده وئرميشدير، ولاكين اوخوجو هئچ بير قرينه‌ده اولمادان، «كسيك باش» ماجراسيني باشا دوشمه‌ليدير. نئجه كي آشاغيداكي فارسجا بئيتي اوخويان هركس ايسه، بو ماجراني يادا سالير:
ما گر ز سر بريده مي‌ترسيديم،
در مجلس عاشقان نمي‌رقصيديم!
شاعيرين بو ماجراني يادا سالماق اوچون اوخوجويا وئرديگي قرينه‌لر آز دگيلدير:
ياخميشام اوزومه آلقان خيناسين،
قوي مني عالمده اغيار قيناسين.
مين فرمان اؤلومله ياريم سيناسين،
دارا گئديرسم‌ده آچمارام اسرار.
بو مصراعلاري دريندن اوخويانا «كسيك باش» قرينه‌لري دام- ديواردان ياغير. صائب دئميشكن:
از در و ديوار صائب شعر مي‌بارد.
يعني هر طرفه باخيرسان قرينه‌دير. دئمك ايسته‌ييرم بئله شعرلره «معما» و «اوشاق اويونو» دئينلر اؤز چئوره‌لرينده اؤزلريندن سيواي بير زاد گؤره بيلمه‌ييرلر. شاعيريميز ايسه اؤزلوگوندن چيخيب «رؤيا»لارا قاپيلان بير قدسي وارليقدير. بو «قدسي وارليق»، تام معناسي ايله «وارليق بيرليگي» (= وحدت وجود) قايناغيندان قايناقلانير و بير انساندا متجلي اولا بيلن بير جوهره‌يه تبديل اولونور.
«آنير قوجام» ـين شعري‌نين اساس جوهره‌سي، هر بير عاريف شاعير كيمي، ذوق، عيان كشف و شهوددور. او، دليل، سبب و استدلال دالينجا گزمير. خط به خط شعرلرينده خلوت، رؤيا، راز، رحمت، آيلانماق . . . دان دانيشير و سئير و سلوك مئيدانلارينا گيرير. يعني بير تجلي‌دن باشقا تجلي و بير نفَسدن باشقا نفَسه سئير ائدير. دئمك اولار كي شعري‌ده اؤزو كيمي بو تجلّيلر و مقاملاردا سئير ائده‌ركن، انتقال حاليندادير. بودا اونا گؤره‌دير كي او، «وارليق بيرليگي»ني كشف ائتميشدير، نسيمي و ختايي روحونو اؤزونده متجلي گؤرموشدور.
اونون گؤروشونجه وارليق بيرليگي (= وحدت وجود) حقيقي بير تعلق آنلامينا گلير، يعني خيالي، وهمي و اعتباري دگيلدير. اونا گؤره شاعيرين ايشلته‌يگي «خيال» و «رؤيا» كلمه‌لري‌ده، وهمي معنا داشيميرلار.
دئمك ايسته‌ييرم كي او اؤزونو نسيمي و ختايي روحونا حاميل ساياندا، بونا حقيقي بير ادعا كيمي باخساق، شعرينده اولان اسرارين آچاريني الده ائده بيله‌جه‌ييك.
شاعير اؤزونو ايلاهي فئيضلر و بركتلر ايله انسانلار آراسيندا بير واسيطه سايير و اودور كي هئي ياغيشدان و آرينماقدان و تميزلنمكدن و حققه ايرمكدن دانيشير.
آنير قوجام هر بير عاريف شاعير كيمي مدّاحليقدان قاچير، ديلينه كيمسه‌نين تعريف- توصيفي گلمير. آمما «چال كيشي» لره گلنده، باش- آياق تانيمير، هم مدح ائدير، هم تعريف و همده بوتون وارليقلاري «وهمي» خيال ائدير و هر يئرده واحيد وارليقدان باشقا بير وارليق گؤرمور. «قشم گئتدي»، «شهريار، او شاعير كي . . . » شعرلري كيمي.
شاعير، وطن تاريخي و وطن طالعي حاققيندادا دوشونن بير فيكير صاحيبيدير. او شعرلرينده «اوجقار بير دره‌ده، بير ايلخي قيرآت گؤرون و هامي‌نين الينه ميصري قيلينج وئره‌ن» بير اجتماعي- سياسي متفكر كيمي ظهور ائتميشدير ( «هله‌ده . . .» شعري). بورادادا بوياسيز و لوت اجتماعي- سياسي مضمونلار ايشله‌دير.
«ياغيش» سؤزوده شاعيرين ديلينده اوينايان بير كلمه‌دير. «ياغيش داملاسي»، «ياغيشدا كؤچ»، «ياغيش قيزي» و . . . عنوانلي شعرلرده اولدوغو كيمي، هر يئرده ياغيشي، ايلاهي رحمت حساب ائدن شاعير بعضن اويناق بير مصراعلار ياراد بيلير:
آي ياغيشين نازلي قيزي،
اولدوزلارين سازلي قيزي!
اؤز يوردومون يازلي قيزي!
سئوينج- غميم، شيرين آجيم!
بورادا «شيرين» سؤزونو «آجي» اوچون صيفت ائدن شاعيرين سؤزلريني «عاديجه‌سينه» اوخوماق اولماز. اونون ديلي نه قده‌ر آري و تميز اولسادا، فورما و مضمون علاقه‌لرينده بير غير عاديليگي واردير. بو غير عاديليگين آچاريني الده ائتمك او قده‌رده چتين ايش دگيلدير. يالنيز بير آز شاعيرين ايچ دونياسي ايله تانيش اولماق گره‌كير. بو تانيشليق ال وئرمزسه، اونون «سؤيله‌م- سؤيله‌م ياغيش» تعبيرين باشا دوشمك اولماياجاقدير. ولاكين شاعير، «اهلْ اوخوجو» اوچون، هر شعرينده قيفيل‌آچما قرينه‌لري يارادير و اوخوجوسونو معنالار بطنينه هيدايت ائدير.
ميثال اوچون اونون «رحمت . . . ياغيش» عنوانلي شعرينه نظر سالاليم. بو شعري عادي حالدا اوخوياندا، هئچ بير زاد اله گلمير. «ياغيشدا ايسلانماق»، «آرينماق»، «اؤزوموزده ياراشيق» و «يارانيش گونلرينده ديرچلمك» تعبيرلري، اوخوجويا غريبه و معما كيمي گلير. ولاكين آزجا دقت ائدنده، شاعيرين عنواندا معنا آچاريني وئرمه‌سيني گؤروروك. او ياغيشي «رحمت» سايير، ايلاهي رحمت!
بونو باشا دوشدوكدن سونرا معنا آيدينلاشير. باشا دوشوروك كي شاعير رحمتدن آرينماغي، يارانيش گونونده (= فطرت‌ده) ديرچلمه‌گي، و اختيار معلم (= پير) حضوروندا، گؤزه‌لليكلره جهت وئرمگي، و اوندان سونرا ياغيش (= ايلاهي رحمت) ايله ايسلانيب اسره‌مگي (= مست اولماغي) اورتايا آتير.
منه بئله گلير كي شاعير «عقل» ايله شعر يازمايير، بلكه‌ده بعضي شعرلريني يازاندان سونرا معنا ائدير. او، اؤزوده شعره «ايلهام» كيمي باخير، ايلهام ايسه «وحي»دن آشاغي بير «حالت»دير. بلكه ائله بونا گؤره‌ده آنير قوجامين شعرلرينده «رؤيا»دان چوخ سؤز گئدير.
آنير قوجام تبريزليدير، اساس آرمانلاري نه اولور- اولسون، ديليميزي آري و تميز ايشلتمگه جان آتير و بو مسأله‌يه چوخ اولوملو باخير. توركجه‌ميزي سئوير، قيسا، يئتگين و بيتگين تعبيرلر، ساده، روان و آخيجي جومله‌لر، جان اوخشايان تشبيه‌لر و استعاره‌لر ايله، شعر ديلينه رنگ و آهنگ وئرير. او، شعره يالنيز اؤلچولو- بؤلگولو مصراعلار كيمي يوخ، اوره‌كدن ديله سيزيب گلن «سُوِيدا» كيمي باخير. بورادا وزن و قافيه اولارسادا، ياخشي اولار. ولاكين البته كي شاعير اؤلچو و بؤلگو قورماغا جان آتمير. اونون قصدي يالنيز و يالنيز ايچ دونياسي‌نين شعر ديلي ايله انعكاسي‌دير.
بو يالنيز كمالا يئتيشن آدامدان باش وئره‌ر و كمالا يئتيشن آدامين سؤزو داوا- درمان (= شعر) ساييلار.
بونونلا بئله، آنير قوجام بعضن شعرده اؤلچو و بؤلگويه چوخ مقيّد اولان بير شاعير كيمي ده گؤرونور. او قوشما، غزل و گرايلي‌دا يازير. ياغيش داملاسي، موژده‌يه حاميلم، ايشيقدان سردار، اول ساييق آماندير عنوانلي و بو كيمي شعرلري ميثال گتيرمك اولار.
شاعيرين ديلي بعضي يئرلرده او قده‌ر آخيجي و رواندير كي، فولكلوريك قوشماجالارا بنزه‌يير:
توت آغاجي،
داغ ياماجي.
هاوا شيرين،
كؤنلوم آجي.
شاعيرين وئرديگي عئيني تصويرلر، بعضن او قده‌ر جانا ياتاندير كي انساني واله ائدير بو واله ائديجيليك يالنيز تصوير اوچون يوخ، بلكه اوندا اولان درين «رؤيا»لار اوچوندور.
گئديرم بو يوللاردا،
آرزيم: محبت- سئوگي،
اللريم، اوره‌گيم بوش!
اللريم، اوره‌گيم بوش.
«رؤيا»لارا قاپيلمايان كيمسه، بو تصويردن نه لذت آپارا بيلر؟
اونون ديلينه و بيان شيوه‌سينه گلديكده، بير آذري شاعيري كيمي، آذربايجان توركجه‌سي‌نين بوتون قايدا- قانونلارينا اويان و ديل چالارلاريني يئرلي يئرينده ايشله‌دن «ديلچيليك عاشيقي» كيمي، ديل دغدغه‌لري گؤسترير. باشقا يئرده «آتش» سؤزجوگونو «آتيش» فورماسيندا گتيرير و يا «اؤز» ضميري يئرينه «كندي» سؤزونو قوللانير و «اولدوز» و ايسه «ييلديز» يازير.
دقت ائديليرسه، بو غيرعاديليك يئنه فورما- مضمون علاقه‌لري اساسيندا و قانونا اويغون اولاراق، شعرلره كؤلگه سالميشدير.
پامبيق باخيشلارينا
آتيش وورولدو.
ميصراعلاريندا «آتيش وورولماق» مركب مصدرينده ايهام واردير. نئجه كي:
كنديميزده ياراشيق
او قامتله دايانسايديق
بير داها ميصر بازاريندا
يوسف ايديك.
ميصراعلاريندا، «كندي» فورماسيندا تأكيد و تشخّص حس اولونور، نئجه «اصلي- كرم» دئديكده، «اصلي» سؤزونده، اصليت و اؤزوللولوك آنلامي واردير.
شاعير:
اوره‌گيم وورولان
ايلديريم
ناسيل شاخاجاقمي گؤره‌ن؟
ميصراعلاريندا، البته كي، «ناسيل» يئرينه «نئجه»ده يازا بيلردي آمما بورادا «ناسيل» سؤزجوگونده داشينان آنلام يوكو «منحصر به فرد» دير. بو، اؤزوده چتين آچيلان بير سيرردير.
بو مقوله‌يه، اونا گؤره تأكيد ائديرم كي گله‌جكده هر كس شاعيرين ديلي حاققيندا آراشديرما آپارماق ايسترسه، منيم بو تأكيديمي گؤز اؤنونه آلسين.
من، هر شاعيرين شعر مجموعه‌سينه اؤن سؤز يازماق اوچون، ايلك اؤنجه اونو كشف ائتمگه و سونرا كشفيمي اوخوجويا چاتديرماغا چاليشميشام. و ظنّيمجه ياديغيم اؤن سؤزلرده، نسبي باجاريغيم اولموشدور و موفقيت الده ائتميشم. لاكين آنير قوجامين بو مجموعه‌سينه يازديقلاريمدا، اونو كشف ائتمه‌ده حله‌ده اؤزومو موفق سايميرام. الده ائتديكلريمي يازديم، قالانيني يازماق، غيرت گؤسترن اهله اوخوجودان رجا اولوناجاقدير.
دكتر ح. م. صديق
تبريز- 1387/7/30
منبع:آيلانديم قاناليق‌لاردا، احد زماني، تبريز، 1387