تقدیم به روح بلند استاد ناظر شرفخانه ای

 

سوسوز دنیز

 

منصور نوری

 

شاه داغیم، چال پاپاغیم،ائل دایاغیم، شانلی سهندیم

باشی طوفانلی سهندیم

                              شهریار

 

منده بیر گون سنه تای یوردوموزا  ائل دایاغیدیم، گئجه گوندوز اویاغیدیم

 

ائلدیریملار شاخاراخ قاره بولوت سنده یاغاندا

 داملا داملا سئل اولوب سفره لی  سینَنده آخاندا

یاغیش آلتیندا باخاندا

 

 

دَلی صُو چایلارا راحت سیغیناخ سئل دایاغیدیم،

دنیانین شور دَنیزی  یوردوموزا ائل دایاغیدیم، گئجه گوندوز اویاغیدیم

 

 جیغاتی داشگین اولاندا ینه قوینومدا اویاردی

نه قَدَر گوجلو گلنده تَتُوی منده دویاردی

 موردی قویروخ بولویاردی

 

 

بیر زامان کی اوجا بُوی دالغا سینَمده بورولاردی

 سیلدیریم داشلارا شاخ سیلّه وروب تئز یورولاردی

 قاییدار کَن دورولاردی

 

کوچَری قوشلار اوزاخدان یولا دوشموش یورولاندا

دسته دسته فلامینگو گوی اوزونده قارالاندا

فره سی لیمده قالاندا

 

 

او گوزل دورنا دوشوب بیر نچه گون بیزده  قالاردی

سولو سینمده پلیکان دوشَنیب دینجین آلاردی

گون باتیب قاش  قارالاردی

 

داغلاریمدا سره لرده دَلی جیران نه گَزَردی

آغ باش اوردکلر عجب شوقیله سینَمده اوزَردی

سان کی دریای خزردی

 

 

منده بیر گون سنه تای یوردوموزا ائل دایاغیدیم

 گئجه گوندوز اویاغیدیم

 

 

 آلیب آغوشیمه یورقون چایا لای لایدا چالاردیم

  اوز خلیجیمده دوروب ساچلارینا هورمه سالاردیم

گولدوروب گویلون آلاردیم

 

یای گونونده گونشین یاندیریجی   ایستی  چاغیندا

 قوشچی، گلمانخانا، رحمانلودا،  دریا قیراغیندا

بَی گَلین کوم سراغیندا

 

قارا گوزلر  منه دینجلماغا درمانه گَلَردی

 تپه دَن دیرناغا قیزلار اوزونو لیمده بَلَردی

قوملار اوسته سَریلَردی

 

بیر زامان کی داماغیم چاغ هه له جانیمده  ساغیدی

کهنه شهره  خویا سلماسه کاظیم داش یاتاغیدی

هر یانیم  گولّو باغیدی

 

یایدا، او شرفخانیه چوخ شانلی قوناخلار گَلن اولدی

آلمانلی،دوبی لی،  باکی لی،  تورک اوغولو هموطن اولدی

ایندی ویران نَدَن اولدی؟

 

بویوم آرتاندا باخیب چولّره هر دم داریخاردیم

کاسامین صبری داشاندا سوزوب اطرافه باخاردیم

خاصاباندا چوخ آخاردیم

 

منده بیر گون سنه تای یوردموزا ائل دایاغیدیم

 گئجه گوندوز اویاغیدیم

 

آمّا بیر چوخلو زاماندی خبریم یوخدی نگاردان

 داها چوخداندی سو آخماز زولا چایدان نه گاداردان

نه باراندوز،  آجی چایدان

 

ایندی ایلّردی کی  شان شوکتیمی الدن آلیبلار

 منی گَل یوخلا  گور ایندی نه یامان درده سالیبلار

 باغلار از دم  سارالیبلار

 

اوره گیم قان سو ایچینده سوسوزام دیندیره نیم یوخ

کَسیلیبدیر سولاریم جیلقی دوزام چیمدیره نیم یوخ

آمّا لای لای دیه نیم چوخ

 

ارومو دریاسی یانیر داده گَلین چوخلو سوسوزدی

باش آچیب یاره لری،  سو یرینه مرحمی دوزدی

عُمری  پیس یرده ادوزدی

 

 

قورویوب دیل دوداغ ایلّردی ئورک یاندی  سوسوزدان،

قیزاریبدور اوزونون رنگی یانیب سینه سی دوزدان

منه بیر ذرّه او بوزدان 

 

بولاغ آخسین گرک البته سو توکسَن آخار اولماز

قوشاچای  شاه داماریمدی منه اغیار یار اولماز

نازلو  تک نازلی یار اولماز

 

آرازین ئوز یری واردیر گوزَلیم یازدا یای اولماز

قولو باغلی جیغاتیم آخسا گر عالَمده تای اولماز

منه زاب دان هارای اولماز

 

نوری ام منده سنین دردیوی یازدیم بیلن اولسون

قورتارسین اوگوز یاشلاری ریما کیمی بیر نارگیلن اولسون

گوز یاشین بیر سیلن اولسون!